Qomşu Rusiyeniñ Federatsiya Şurası halqara işler komitetiniñ yolbaşçısı Konstantin Kosaçev, New-Yorkta Qırımnen bağlı qarar rezolütsiyası içün rey berilüvini Ukrainanıñ «intiqamı»i dep saya ve BMT’na (OON) «ğarp ve Kyivniñ yarımadağa qarşı yapqan areketlerini» közden keçirmesini teklif ete.
Bu aqta o noyabrniñ 15-nde, BMT (OON) Baş Assambleyasınıñ Üçünci komitetinde Rusiye tarafından ilhaq etilgen Qırımda insan aqları qararına izaat bergende Facebookta yazmaqta.
«BMT (OON) Baş Assambleyasınıñ Üçünci komiteti içün Ukraina ve Ğarpnıñ Qırımğa qarşı yapqan areketlerini ayrı bir dosye şeklinde azırlamaqnıñ vaqtı kelmedimi, aceba? İşte anda uydurma olmağan ve kerçek olğan bir sürü faktlar mevcut», – dep yaza Kosaçev.
Senatornıñ fikrine köre, New-Yorkta keçken rey berüv «Ğarpnıñ zemaneviy rusofob areketleriniñ yansıması olaraq, yalıñız Qırım sakinlerine yardım etmeme degil de, Rusiyeden intiqam alma ıntıluvlarınıñ bir aksidir».
İşğal altındaki Qırım adından Devlet Duması deputatı olğan Ruslan Balbek de bu fikirge qol tutaraq, BMT (OON)Baş Assambleyası Üçünci komitetiniñ qararı dersin, Ğarpnıñ «Rusiyege qarşı olğan fikirlernen» bağlı emiş.
«BMT (OON) Baş Assambleyası öz qararlarını delillerge degil de, «qabaatı bar dep sayılmaqta» printsipine esaslanıp qabul ete. BMT memurları kütleviy sürette Rusiye aleyhdarları tarafına keçtiler demek mümkün ve onıñ obyektivligini ancaq büyütici cam vastasınen körmek mümkün. İşbu siyasiy strategiya, ilk baştan bile Qırımda yahşılıq olması imkânsız degen mananı bilidire, çünki anda Rusiye bar», – deyerek TASS, Balbekniñ sözlerini misal etip ketire.
Noyabrniñ 14-nde New-Yorkta keçken BMT (OON) Baş Assambleyası Üçünci komitetiniñ toplaşuvında işğal altındaki Qırımda insan aqlarınen bağlıqararınıñ yañartılğan leyhası qabul etilgen edi.
Qarar leyhasını Ukraina BMT (OON) Baş Assambleyası Üçünci komitetiniñ kâtibiyetine 2017 senesi oktâbr ayındataqdim etken edi. Anda Rusiyeden BMT (OON) Halqara Adalet Mahkemesiniñ Qırımda qırımtatar halqınıñ Milliy Meclisi yasağınıñ lâğu etilmesi, yarımadada ukrain ve qırımtatar tillerinde tasil alınuvı teşkil etmesinen bağlı muvaqqat tevsiyeler yerine ketirilmesi talap etilgen edi.
Ukraina prezidenti Petro Poroşenko, BMT Baş Assambleyasınıñ Üçünci kömütet toplaşuvında qabul etilgen Qırımda insan aqlarınıñ vaziyetinen bağlı qarar leyhasını alğışlap, Qırımnıñ azat etilmesi meselesinde Rusiye akimiyetine kösterilgen halqara birdemlik signalı olğanını qayd etken edi.
