Qırımtatar Milliy Meclisi yolbaşçısınıñ muavini İlmi Umerovnıñ firkine köre, oñıñ «Avropanıñ hatıra ve namus plotformaları» adlı mukâfatnen taqdirlenmesi, qırımtatar halqınıñ yararlıqları tanılması demektir.
Bu aqta o noyabrniñ 13-nde «Ukrinform» informagentliginde jurnalistlernen yapqan körüşüvinde bilidirdi.
Umerov onıñ mukâfatnen taqdirlenüvini «Avropa seviyesinde Ukraina ve qırımtatar halqınıñ problemleri olğanınıñ tanılmasıdır», dep saya.
«Men bellesem, qırımtatarlarınıñ işğal etilgen Qırımdaki pozitsiyası, menim 2017 senesi nominant olmama yardım etkendir. Bu menim, yalıñız menim aqqım degil. Bu bütüm halqımnıñ aqqı», – dey Umerov.
Qırımtatar Milliy Meclisi yolbaşçısınıñ muavini İlmi Umerov noyabrniñ 8-nde Parijde «Kommunizmniñ 100 yıllığı. Tarih ve hatıra» konferentsiyasında esnasında, «Avropanıñ hatıra ve namus plotformaları» adlı mukâfatnen taqdirlendi.
«Avropanıñ hatıra ve namus plotformaları» adlı mukâfatnıñ resmiy saytında haber etilgenine köre, teşkilâtnıñ azaları mukâfatnıñ «totalitarizmge qarşı demokratiya, insan aq-uquqı ve azatlığı, qanun üstünligi oğrunda alıp barğan küreşiniñ tanılması» içün İlmi Umerovke berilmesine rey bergen.
Qırımtatar milliy Meclisi reisiniñ muavini İlmi Umerov eki yıllıq yaşav tarzındaki koloniyada qalmasına üküm etilip, eki yıl devamında açıq faaliyetnen oğraşması ve kütleviy haber vastalarında çıqış yapması yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyaset sebebinden olğanını aytqan edi.
Rusiye akimiyeti İlmi Umerovnen Qırımda mahküm etilgen qırımtatar halqınıñ liderlerinden biri olğan Ahtem Çiygoznı azat etip, oktâbrniñ 25-nde Türkiyege teslim etken edi. Ondan soñ Umerov ve Çiygoz Kyivge kelip çıqtılar.
İlmi Umerov Almaniyada ekimlerniñ teşkerüvinden keçip tedaviylengen soñ, Qırımğa barmaq niyetinde olğanını bildirgen edi.
