Rusiye prezidenti Vladimir Putin, Rusiyeniñ Soçi şeerinde ötkerilgen Türkiye prezidenti Recep Tayyip Erdoğannen körüşüvinden soñ noyabrniñ 13-nde, eki devlet arasındaki munasebetler aman-aman tolu kölemde evelki alğa keldi dep saymaq mümkün olğanını bildirdi.
Onıñ aytqanına köre, Rusiyenen Türkiye arasındaki mal aluv ve satuv köleminde keçken yılda 30 faiz eksilüv olğan soñ bu yılnıñ ilk aylarındaki artuv 38 faiznı teşkil etti.
Putin, Rusiyenen Türkiye, cümleden telükesizlik ve Suriyede nizamnıñ tiklenmesinde olğanı kibi «praktik olaraq bütün yönelişlerde işbirligini devam ettireler», dep ilâve etti.
Erdoğan bu körüşüvge ketmezden evel bazarertesi künü İstanbulda Putinge nisbeten «aziz dosum» ibaresini qullandı, dep bildire Qırım.Aqiqat.
Türkiyeniñ prezidenti Rusiyede, Ankaranıñ Moskvadan S-400 uçaqlardan qoruma raketa sistemalarını satın aluv planlarınıñ tafsilâtlarını muzakere etmek niyetindedir.
Keçken sefer eki prezident sentâbrniñ 28-nde Ankarada körüştiler.
2015 senesiniñ noyabr ayında Türkiye Suriyeniñ sıñırına yaqın yerde Rusiyeniñ arbiy uçağını urıp tüşürgen soñ Rusiyenen Türkiye arasındaki munasebetler birden bozuldı. Ankaranıñ NATO tarafından tasdiqlanğan malümatına köre, Rusiyeniñ uçağı bir qaç tenbilevge rağmen Türkiyeniñ ava boşluğınıñ sıñırlarını bozdı. Moskva bunı red ete.
Lâkin Türkiyede 2016 senesiniñ yazında muvafaqiyetsiz devirüv teşebbüsi yapılıp, keñiş mıqyaslı on biñlerce «işançsızlar»nı bastıruv kampaniyası olıp keçken soñ Ğarp tarafından keskin bir tenqitke oğrağan Türkiyeniñ akimiyeti tekrar Rusiyege muracaat etti. Erdoğannen Putin eki devlet arasında ğayrıdan munasebetler qurıp başladılar.
Aynı zamanda eki taraf Suriyedeki vaqialarda bir-birine qarşı olıp iştirak eteler. Rusiye Suriyeniñ avtoritar prezidenti Başar al-Asadnıñ rejimine arbiy ve diplamatik saalarda qoltuta. Türkiye ise Asadnı yıqmaq istegen Suriye küçleriniñ bir qısmına yardım ete.
