Noyabrniñ 8, çarşenbe künü, Qırımda ve Rusiyede tutulğan ukrain siyasiy mabusları içün ötkerilgen hayriye auktsionı devamında otuz biñ grivnadan ziyade toplanılğan. Bunı Qırım.Aqiqatqa bergen izaatında Ukraina Tışqı işler naziriniñ siyasiy mabuslarnen bağlı suallerde mesleatçısı olğan qırılmı Gennadiy Afanasyev haber etti.
«Bügün otuz biñden ziyade cıyıp oldıq. Pek çoq adam yoq edi, amma bazı mahsullar içün büyük reqabet bar edi: Putinniñ (Rusiye prezidenti – QA) bet sıması ile kürsü, Qara deñiz resimi, Kolçenkonıñ tatası tarafından azırlanılğan eşya. Zanımca, netice olduqça yahşıdır», – dedi Afanasyev.
Onıñ sözlerine köre, satılmağan mahsullar açıq satılışqa çıqqan soñ, toplanılğan paranıñ miqdarı artacaq.
Noyabrniñ 8, çarşenbe künü, Kyivde hayriye auktsionı ötkerilgen edi. Onda ukrain siyasiy mabuslarına yardım etmek içün çeşit türlü icadiy işlerni satın almağa teklif etile edi.
Ukraina Tışqı işler nazirligi (MİD) zapt etilgen Qırımda Ukraina vatandaşlarına qarşı basqı ve taqip areketleri yapılğanından raatsız olğanını defalarca bildire edi. Bunıñnen beraber MİD, Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
