Qırımtatar faali Seytumer Seytumerovğa Bağçasaray bölge mahkemesiniñ qararınen eki biñ ruble cöreme yazdırdılar. Bunı noyabrniñ 8-nde Azatlıq Radiosı rus hızmetiniñ muhabiri bildire.
Seytumerovnı Rusiye Federatsiyası Memuriy cinayetler aqqında kodeksiniñ 20.3 maddesi boyunca yani 2012 yılında içtimaiy ağda Rusiyede yasaq etilgen «Hizb ut-Tahrir» teşkilâtınıñ simvolikasını neşir etkeninde qabaatladılar.
Noyabr 8 sabasında politsiya memurları Seytumerovnıñ evinde tintüv yapıp bilgisayar, fleşkartlar, kündelik defteri ve kitaplarını tutıp aldılar. Uquqnıñ bozuluvı aqqında protokolnı Ekstremizmge qarşılıq kösterüv boyunca merkezniñ operativ hadimi Ruslan Şambazov tizdi. Onıñ malümatına köre, neşir etilüv vaqiası 2017 senesi oktâbrniñ 18-nde tayin etilgen edi.
«İhtimal, 2011-2012 yıllarında bir şeyler neşir etkendirim. Lâkin 2014 senesinde neşir etilgen malzemelerge diqqat etmek kerekligi aqqında tebilengenimden soñ bütün eski qaydlarımnı közden keçirip, Rusiye qanunlarına zıt kele bilgen bütün şeylerni sildim. Ola bilir ki, bir şeyler qaçırğandırım, amma 2014 senesinden soñ içtimaiy ağlardaki neşirlerimde iç bir terrorist ve ekstrimist teşkilâtlarınıñ simvolikasını qullanmadım. Men qanunlarnı ürmet etken vatandaşım ve qanun bozuluvlarına yol bermedim», – dep añlattı Seytumerov.
Onıñ menfaatlarını temsil etken uquqçı Lilâ Gemerci, 2012 senesinde mezkür neşir Qırımda cariy olğan qanunlarnı bozmay edi, dedi.
İmayeciniñ delilleri hakem German Atamanükni qandırmadı. Oturışuv esnasında foto ve video çekimler yasaq etildi, boş yerler olğanına rağmen yurtdaşlarına qoltutmaq içün kelgenlerniñ bir qısmına mahkeme zalına kirmege izin berilmedi. Oturışuvğa kirmege izin alamağanlar şikâyetler yazdı.
Noyabrniñ 8-nde ilhaq etilgen Qırımnıñ Bağçasaray ve Eski Qırım şeerleri ile Aqmescit bölgesiniñ Şumhay (Zareçnoye) köyünde faaler ve cemaatçılarnıñ evlerinde tintüvler yapıldı.
«Krımskaya solidarnost»niñ malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay) evlerinde yapıldı. Bu anğa qadar Seytumerovdan ğayrıları içün areket serbestliginiñ sıñırlanmaları lâğu etildi.
Rusiye telükesizlik küçleriniñ memurları tarafından şimdilik buña dair iç bir izaat berilmedi.
Qırım Rusiye tarafından ilhaq etilgen soñ FSB yarımadada mustaqil jurnalistler, qırımtatar faalleri, muhalif ve Ukrainanıñ tarafını tutqan cemaatçılar ve diniy azlıqlarnıñ vekillerini nizamlı surette yaqalay, soraştıra ve evlerinde tintüvler yapa. Uquqqoruyıcılar Rusiye telükesizlik küçleriniñ bu areketlerine, siyasiy maqsatlı areketler deyler.
