Link açıqlığı

Noyabrniñ 8-nde saba Aqmescitte daa bir tintüv yapılğan – uquqqoruyıcı


Noyabrniñ 8-nde saba Aqmescitte qırımtatar faali Abduraman Mecitovnıñ evinde de tintüv yapılğan. Bu aqta Qırım.Aqiqatqa bergen izaatında qırımlı uquqqoruyıcı Rustem Kâmilev ikâye etip bere.

«O, Aqmescitli. Bügün onıñ evinde de tintüv yapılğan. Demek ki, bu beşinci tintüv. Onı alıp ketkenler ve bizler alâ daa onıñ ne yerde olğanından haberimiz yoq», – dey Kâmilev.

Uquqqoruyıcınıñ sözlerine köre, o faalni ne içün ve ne yerge alıp ketkenlerini bilmege areket ete eken.

Noyabrniñ 8-nde Bağçasaray, Eski Qırım ve Aqmescit rayonınıñ Şumhay (Zareçnoye) köyünde yaşağan faaller ve cemaatçılarnıñ evlerinde tintüvler ötkerildi.

Rusiyeli küç idareleri şimdilik bu hususnen bağlı açıq izaat bermey.

Rusiye Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı, dep saya.

XS
SM
MD
LG