İşğal altındaki Qırımnıñ Bağçasaray şeerinde noyabrniñ 8-nde ötkerilgen tintüvden soñ tutulıp alınğan qırımtatar faali Seytumer Seytumerovnıñ mahkemesi başlandı. Bu aqta noyabrniñ 8-nde Qırım.Aqiqatqa bergen izaatında, qırımlı advokat Edem Semedlâyev ikâye etip berdi.
«Bağçasarayda Seytumer Seytumerov tutulıp alındı. Şimdi onıñ memuriyqabaatlavı boyunca mahkeme keçirilmekte. Oña 15 künlük memuriy apis cezası ya da oña biñ (413 grivna civarında – QA) ile eki biñ (826 grivna civarında – QA) ruble arasında bir ceza kesilebile», – dey Semedlâyev.
Daa evel Semedlâyev, Seytumer Seytumerovke nisbeten Rusiye kodeksiniñ memuriy qabaatlav maddesine istinaden «Natsizm propagandası ya da ekstrimizm» maddeleri boyunca memuriy protokol tizilgenini bildirgen edi.
Noyabrniñ 8-nde Bağçasaray, Eski Qırım ve Aqmescit rayonınıñ Şumhay (Zareçnoye) köyünde yaşağan faaller ve cemaatçılarnıñ evlerinde tintüvler ötkerildi.
«Qırım birdemliginiñ» malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay –Zareçnoye köyü) evlerinde keçirilgen. Seytumerovdan ğayrı er kes artıq raat areket etmesi mümkün.
«Qırım birdemligi» cemaat teşklilâtı bildirgenine köre,evinde tintüv keçirilgen qırımlı Seytumer Seytumerov politsiya şubesine alıp ketkenler.
Rusiyeli küç idareleri şimdilik bu hususnen bağlı açıq izaat bermey.
Rusiye Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı, dep saya.
