Link açıqlığı

Eski Qırımdaki tintüvler esnasında faalniñ parası ğayıp oldı – advokat


Oktâbr 8 çarşenbe künü Eski Qırımda Ruslan Belâlovnıñ evinde yapılğan tintüv esnasında üç biñ AQŞ dolları ile 60 biñ Rusiye rublesi (qararnen 24 biñ hrivna – QA) ğayıp oldı. Bunı Qırım.Aqiqat içün izaat bergen uquqqoruyıcı Rustem Kâmilev bildirdi.

«Üç biñ AQŞ dolları ile 60 biñ ruble hırsızladılar. Olarnıñ «tutıp alınması» protokolda qayd etilmedi. Biz protokolnı kördik ve tutıp alınğan şeylerni de kördik – anda para yoq. Demek, ımpıs-tımpıs etip çaldılar», – dedi Kâmilev.

Onıñ aytqanına köre, Belâlovğa şimdilik iç bir qabaat isnat etilmey.

«Ondan tehnikanı tutıp aldılar, añlaşıla, bir şeyler tapmaq içün. Aqşam almaq içün kelirsiñ, dediler. Baqarmız», – dedi o.

Rusiye telükesizlik küçleriniñ memurları tarafından buña dair şimdilik iç bir izaat berilmedi.

Noyabrniñ 8-nde ilhaq etilgen Qırımnıñ Bağçasaray ve Eski Qırım şeerleri ile Aqmescit bölgesiniñ Şumhay (Zareçnoye) köyünde faaler ve cemaatçılarnıñ evlerinde tintüvler yapıldı.

«Krımskaya solidarnost»niñ malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay) evlerinde yapıldı.

Qırım Rusiye tarafından ilhaq etilgen soñ FSB yarımadada mustaqil jurnalistler, qırımtatar faalleri, muhalif ve Ukrainanıñ tarafını tutqan cemaatçılar ve diniy azlıqlarnıñ vekillerini nizamlı surette yaqalay, soraştıra ve evlerinde tintüvler yapa. Uquqqoruyıcılar Rusiye telükesizlik küçleriniñ bu areketlerine, siyasiy maqsatlı areketler deyler.

XS
SM
MD
LG