Qırımlı advokat Edem Semedlâyev bildirgenine köre, noyabrniñ 8-nde Bağçasarayda keçirilgen tintüvden soñ tutulğan Seytumer Seytumerovke nisbeten Rusiye kodeksiniñ memuriy qabaatlav maddesindeki «Natsizm timsalleriniñ propagandası ya da açıq numayışı»na istinaden memuriy protokol tizilmekte.
Semedlâyev bu aqta Facebookta bildirmekte.
«Seytumer Seytumerovke nisbeten Rusiye Memuriy qabaatlav Kodeksi 20.3 maddesiniñ 1 qısmına istinaden memuriy protokol tizilmekte», – dep yaza binağa keçirilmesine ruhset berilgen Semedlâyev.
Seytumerovnıñ sözlerine köre, oña biñ (413 grivna civarında – QA) ile eki biñ (826 grivna civarında – QA) ruble arasında bir ceza kesilebile ya da qabaatlanmasına sebep olğan eşyanıñ musadere etilmesinen beraber, on beş küngece memuriy apis cezası berilebile.
Noyabrniñ 8-nde Bağçasaray, Eski Qırım ve Aqmescit rayonınıñ Şumhay (Zareçnoye) köyünde yaşağan faaller ve cemaatçılarnıñ evlerinde tintüvler ötkerildi.
«Qırım birdemliginiñ» malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay –Zareçnoye köyü) evlerinde keçirilgen. Seytumerovdan ğayrı er kes artıq raat areket etmesi mümkün.
«Qırım birdemligi»cemaat teşklilâtı bildirgenine köre,evinde tintüv keçirilgen qırımlı Seytumer Seytumerov politsiya şubesine alıp ketkenler.
Rusiyeli küç idareleri şimdilik bu hususnen bağlı açıq izaat bermey.
Rusiye Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı, dep saya.
