Link açıqlığı

İslâm Terekte yaşağan regional Meclis reisiniñ evinde tintüv keçti - «Qırım birdemligi»


İşğal altındaki Qırımnıñ İslâm Terek (Kirovskoye) qasabasında yaşağan İslâm Terek rayonınıñ regional Meclis reisi Ekrem Abdulvatovnıñ evinde tintüv keçti.

Bu aqta Facebookta «Qırım birdemligi» cemaat teşklilâtı bildirmekte.

Abdulvatov bildirgenine köre, küç idatresiniñ hadimleri ellerindeki qararğa istinaden tintüv yapmağa kelgen ekenler.

Qırım.Aqiqat vaqianıñ inceliklerini bilmege areket ete.

Noyabrniñ 8-nde Bağçasaray, Eski Qırım ve Aqmescit rayonınıñ Şumhay (Zareçnoye) köyünde yaşağan faaller ve cemaatçılarnıñ evlerinde tintüvler ötkerildi.

«Qırım birdemliginiñ» malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay –Zareçnoye köyü) evlerinde keçirilgen. Seytumerovdan ğayrı er kes artıq raat areket etmesi mümkün.

«Qırım birdemligi»cemaat teşklilâtı bildirgenine köre,evinde tintüv keçirilgen qırımlı Seytumer Seytumerov politsiya şubesine alıp ketkenler.

Rusiyeli küç idareleri şimdilik bu hususnen bağlı açıq izaat bermey.

Rusiye Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı, dep saya.

XS
SM
MD
LG