Bağçasaray, Eski Qırım ve Aqmescit rayonınıñ Şumhay (Zareçnoye) köyünde yaşağan faaller ve cemaatçılarnıñ evinnde tintüvler keçe. Noyabrniñ 8-nde Facebookta bu aqta «Qırım birdemligi» cemaat birleşmesi yazmaqta.
Alınğan malümatqa köre, rusiyeli küç idareleri Bağçasarayda faal ve cemaatçı Seytumer Seytumerovnıñ evine tüntüv maqsadınen kelgenler.
Seytumerov Qırımda yarımadanıñ çeşit köşelerinde peyzaj fotoresimleri çekken fotografçı olaraq tanıla. Açıq menbalardan alınğan malümatqa köre o, iqtisadiy tasil saibi eken ve oktâbrniñ 11-nde tutlıp alınğan ve saibiAsanov Marlenniñ (Suleyman) olğan Salaçıq kafesinde idaresi olaraq çalışa eken.
Bügün Seytumerovnıñ evinde keçirilgen tintüvnen bağlı izaat bergen «Qırım birdemliginiñ» fallerinden biri, bunıñ «Qırım birdemligi» faallerine Qırımda vaqialar aqqında bir şey bilidrmeden susıp oturmağa mecbur etmek içün biri-biri artından kelgen ve maqsatkâr bir basqıdır», dep ayta.
Ayrıca, bu areket temsilcileri bildirgenine köre, tintüvler Eski Qırımnıñ Krestyanskaya soqağında yaşağan faal Alimdar (pasportına köre Ruslan) Belâlovnıñ evinde de keçirilmekte. O, Halal Fast Food cemaat yemekhaneler zıncırında çalışqanı aqqında haber etile.
Diger bir tintüv Aqmescit rayonınıñ Şumhay (Zareçnoye) köyüniñ sakini Eldar Kantemirovnıñ evinde ötkerilmekte.
Qırımlı advokat Edem Semedlâyev ve Emil Kurbedinov tintüvlernen bağlı malümatnı tasdıqlay.
«Rusiye hususiy hızmetleriniñ «Qırım birdemligine» qarşı doğrultılğan nevbettekı «darbesi»»! Bir qaç regionda tintüvler keririle!», – dep yaza Kurbedinov Facebookta.
Semedlâyev haber etkenine köre, onı Bağçasaraydaki tintüvge kirsetmey ekenler.
Qırım.Aqiqat meseleniñ inceliklerini bilmege areket ete.
Rusiyeli küç idareleri şimdilik bu hususnen bağlı açıq izaat bermey.
Oktâbrniñ 11-nde saba rusiyeli küç idareleri Bağçasarayda yaşağan bir qaç qırımtatarınıñ evinde tintüvler keçirgenleri aqqında belli oldı.
Rusiyeli küç idareleri tintüv keçirilgen yerge kelgen insanlarnı tutıp alğanlar.
Rusiyeli KHV Rusiye FSBsiniñ matbuat hızmetine dayanaraq, rusiyeli küç idare hadimleri Qırımda, Rusiye ve işğal etilgen Qırımda yaşaqlanğan «Hizb ut Tahrir» teşkilâtınıñ bağçasaraylı şubesini yoq etkeni aqqında haber etken edi.
Tintüvden soñ apiske alınğan ve FSBge alıp ketilgen Qırımnıñ altı sakinini küç idare hadimleri «Hizb ut-Tahrir» teşkilâtınen alâqası olmaqta şekley, dep tasdıqlar uquq qoruyıcılar.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
Rusiye Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı, dep saya.
