2017 yılınıñ iyuninde Avropa Telükesizlik ve İşbirligi Teşkilâtınıñ (ATİT) konferentsiyasında ilhaq etilgen Qırımda söz serbestliginiñ sıñırlanması vaqialarını red etmege tırışqan Aqyardaki Rusiye jurnalistler birligi teşkilâtınıñ yolbaşçısı Sergey Gorbaçov, Qırımnıñ ilhaqından çoq evel Rusiye vatandaşı olğanını itiraf etti.
Gorbaçov, ATİT-niñ nevbetteki tedbirinde iştirak etmek maqsadınen alacaq olğan vizanıñ Avstriya tarafından berilmegenini TASS içün yorumlar eken, daa evel «böyle tedbirde iştirak etmek maqsadınen Avstriyağa barğanını» ve bu sebepten Avstriya akimiyetiniñ qararına taaciplengenini bidirdi. O, oña «pasportını Qırımda 2014 senesinden soñ alğanını sebep kösterip viza bermediler», dey.
O: «Asılında menim içki pasportım 10 yıl evel (Rusiyedeki – QA) Rostov vilâyetinde, çetel pasportım ise Kubanda berildi. Böylelikle viza bermemek içün iç bir resmiy sebep yoq edi», – şeklinde ikâye ete.
İyunniñ ortasında Venada keçken ATİT konferentsiyasında Aqyardaki Rusiye jurnalistler birligi teşkilâtınıñ yolbaşçısı, arbiy pensioner, Rusiye Qara deñiz flotu tarafından çıqarılğan «Flag Rodinı» gazetasınıñ sabıq hadimi Sergey Gorbaçov, Qırım jurnalistleriniñ vekili olaraq Qırımda söz serbestliginiñ sıñırlanması vaqialarınıñ olğanını red etip, Qırımda bu saada iç bir problemanıñ olmağanını isbatlamağa tırışa edi. Ukraina eyetiniñ azaları, qanunsız teşkilâtnıñ azası olğanı içün Gorbaçovğa söz bermemekni talap ettiler.
Rusiye Tış işleri naziri Sergey Lavrov, ATİT-te ötkerilecek keñeşniñ iştirakçileri olaraq qayd etilgen Qırım haber vastalarınıñ jurnalistlerine noyabrniñ 3-nde Avstriya tarafından viza berilmedi, dep bildirdi. Sergey Gorbaçov – olarnıñ arasındadır.
Avstriya Tış işleri nazirliginiñ başlığı, Moskvadaki Avstriya elçiligi tarafından Qırım sakinlerine vizalarnıñ berilmegeni, Qırım Rusiye tarafından ilhaq etilgen soñ tüzetilgen Avropa Birliginiñ (AB) qaidelerinen alâqalıdır, dep bildire. Yarımadanıñ sakinleri vizalarını Ukrainanıñ qıtadaki qısmında bulunğan AB konsullıqlarında almaq kerekler.
Avstriya tarafından vizaları berilmegen Qırım jurnalistleri, Avropağa kiriş vizalarını almaq maqsadınen noyabrniñ 7-sinde tekrar vesiqalar bermege niyetlengenlerini bildirdiler.
