Rusiye Baş ştabınıñ yolbaşçısı Valeriy Gerasimov noyabrniñ 7-sinde, Qırımda tam bir ordular gruppirovkası meydanğa ketirildi, dep bildirdi. Rusiyeniñ kütleviy haber vastaları bildirgeni kibi, Gerasimov bunı salı künü Rusiye Mudafaa nazirliginiñ kollegiyasında beyan etti.
TASS, Rusiye Baş ştabı yolbaşçısınıñ sözlerini «Qırımda, içine arbiy-deñiz bazası, askeriy korpus, uçaq divziyası ve avadan ucumğa qarşı mudafaa diviziyası kirgen mustaqil ordular (küçler) gruppirovkası meydanğa ketirildi» şeklinde bildirmekte.
Baş ştab yolbaşçısınıñ sözlerine köre, Rusiyeniñ Qara deñiz flotu altı suvaltı gemisi, qanatlı raketalarnen silâlandırılğan «Admiral Grigoroviç» ve «Admiral Essen» fregatları ve üç «Bal» ve «Bastion» yalı raketa kompleksleri ile tekmilleştirildi.
Noyabrniñ başında Rusiyeniñ Cenübiy arbiy okrugı komandanı Aleksandr Dvornikov, Rusiyeniñ Qara deñiz flotu ile Hazar deñizi flotiliyasında arbiy talimlerniñ ve şu cümleden top ve raketa atışlarınıñ şiddeti üç qat arttırıldı, dep bildirdi.
Rusiye 2014 senesinde Qırımnı ilhaq etken soñ yarımadada er yıl arbiy talimler yaptıra. Ukrainanıñ Baş ştabında, Rusiye tarafından ilhaq etilgen Qırımda yaptırılğan arbiy talimlerge qanunsız deyler.
