İşğal altındaki Qırımnıñ rusiyeli sıñırcıları Ukraina vatandaşı olğan bir qadından urbası tübüne saqlanğan eki milliondan rubleden ziyade para (826 biñ grinva – QA) musadere etkenleri aqqında bildirmekte.
Bu aqta nazirlikniñ matbuat hızmetine istinaden «RİA Novosti» agentligi bildirmekte.
«Sorav neticesinde qadın, bu paranı «Qırımda ev satın almaq içün balalarına alıp ketkeni ve Ukraina keçiş noqtasında çekip alacaqlarından qorqqanı sebebinden, qayd etmege istemegeni aqqında aytqan», - dep bildire agentlik Rusiye sıñırcılarınıñ sözlerini.
Olar musadere etilgen para Rusiye nezaretindeki Canköy gümrük noqtasınıñ müfettişine berilgeni aqqında bildirmekte.
Ukraina Devlet sıñır hızmeti bu hususta açıq bir izaat bermey.
Qırım 2014 senesiniñ başında Rusiye tarafından ilhaq etilgeninden soñ Ukrainanıñ esas qısmı ve yarımada arasında memuriy, lâkin aslında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» olmaq üzre, üç kiriş-çıqış nezaret noqtası çalışmaqta.
