Qırımtatar halqı Milliy Mecslisi reisiniñ muavini İlmi Umerov Ukrainskaya pravdağa bergen intervyusında, onı Rusiye prezidenti Vladimir Putinge af etilmesi ricasınen mektüp yazmağa mecbur etkenleri ve Türkiye nasıl alıp ketilgeni aqqında ikâye etip berdi.
«Meni aldatıp, hastahane yatağından çıqararaq, sanki dersiñ, bir qararnen tanıştırmaq maqsadınen Aqmescitke alıp keldiler. Olarnen beraber Aqmescitke keldim. Belli bir vaqıttan soñ, maşnanıñ mat camından körüngen bazı alâmetlerge köre men, havalimanına keleyetqanımıznı añladım», – dep ikâye ete Umerov.
Biraz vaqıt keçken soñ, onıñ uçaqqa minmesini rica etkenler ve anda o Ahtem Çiygoznen beraber on beşke yaqın sportçı sıfatlı adamlarnı körgen.
İlmi Umerov qaba bir tarzda Çiygoznıñ yanına barmaycağı, körüşmeycegi ve laf etmeycegi aqqında tenbiylengen.
Meclis muavininiñ sözlerine köre, uçaq yaqıt almaq maqsadınen mecburen Anapada qonğan eken.
«Eki saattan soñ uçmağa devam ettik. Deñiz üstünden uçıp keçerek, qara körüngen soñ – hususiy türk mimariyesi yani – er bir mesken yerde cami ve qırmızı damlar körünip başladı. Bu yerler Türkiyedir, dep tüşünmege başladıq. Biraz sakinleştik. Ahır-soñu Sibir ya da apishane degil ya. İşte böyleliknen Türkiyege kelip çıqtıq», – dep ikâye etti o.
Meclis reisiniñ muavini prezidentniñ fermanını körmegeni ve kimse işğal altındaki Qırımdan çıqmasına bir şart qoymağanını qayd etti.
Qırımtatar milliy Meclisi reisiniñ muavini İlmi Umerov eki yıllıq yaşav tarzındaki koloniyada qalmasına üküm etilip, eki yıl devamında açıq faaliyetnen oğraşması ve kütleviy haber vastalarında çıqış yapması yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Rusiye akimiyeti İlmi Umerovnen Qırımda mahküm etilgen qırımtatar halqınıñ liderlerinden biri olğan Ahtem Çiygoznı azat etip, oktâbrniñ 25-nde Türkiyege teslim etken edi. Ondan soñ Umerov ve Çiygoz Kyivge kelip çıqtılar.
İlmi Umerov Almaniyada ekimlerniñ teşkerüvinden keçip tedaviylengen soñ, Qırımğa barmaq niyetinde olğanını bildirgen edi.
