Ukrainada Qırım ve Donbasstan mecburen köçken 1,5 milliondan ziyade kişi cedvelge alındı. Bunı nazirlikniñ haber hizmeti bildirmekte.
Bildirüvde: «Vilâyetler ve Kyiv şeer devlet memuriyetleri yanındaki ealini içtimaiy qoruv şubeleriniñ malümatına köre, Donbass ve Qırımdan mecburen köçken 1 521 702 kişi ya da 1 239 718 qoranta cedvelge alındı», – denilmekte.
Nazirlikte, 2017 senesi noyabrniñ 6-sındaki vaziyetke köre, yardım alğanlarğa 2,37 millionğa yaqın hrivna tölendi, dep bildirildi.
Ukrainanıñ İçtimaiy siyaset nazirligi oktâbrniñ 23-üne qadar Ukrainada 1,6 millionğa yaqın mecburen köçkenni saydı. Maliy yardım alğanlarğa oktâbr ayı içün eki milliondan ziyade hrivna ayırıldı.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña “tarihiy adaletniñ tiklenmesi”, dey.
