Link açıqlığı

Devlet Dumasınıñ deputatı Qırımnıñ Ukrainağa teslim etilmesinen bağlı sovet aktlarınıñ lâğu etilmesini teklif ete


Rusiye Devlet Dumasınıñ deputatı Konstantin Zatulin, Rusiye işğal etilgen Qırımnıñ 1954 senesi Ukraina erkânına berilmesinen bağlı aktlarnı lâğu etmek kerek olğanını bayan etti.

«Sovetler Birliginiñ devamcısı olğan devletniñ qanun çıqarğan organı, 1954 senesiniñ aktalarınıñ lâğu etilmesinen bağlı qarar qabul etmek kerek, çünki bizler 2014 senesi birisiniñ toprağını çekip aldıq, birisiniñ deñizini çekip aldıq degen laflarnı eşitmekten bezdik», – dedi Zatulin «Qırım dostlarınıñ forumı» toplaşuvında.

Noyabrniñ 6-nda Yaltada «Qırım dostlarınıñ forumı» açıldı. Kreml nezaretindeki Rusiye Devlet Dumasındaki Qırım deputatı Mihail Şeremetniñ malümatına köre, yarımadağa 90 yaqın çetel musafiri kelgen.

2014 senesi martnıñ 16-nda Qırımda ve Aqyar şeerinde yarımadanıñ statusınen bağlı dünyada tanılmağan referendum olıp keçti, onıñ neticesi olaraq, Rusiye Qırımnı öz terkibine kirsetti. Ukraina, Avropa Birligi, ABD bu rey berüvni tanımadı. Martnıñ 18-nde Rusiye prezidenti Vladimir Pütin Qırımnı Rusiyege «qoşulğanı» aqqında ilân etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG