Esas Ukrainada yerleşken telekanal ve matbuat, Qırımda olıp keçken vaqialarnı daa da etraflıca ve insanlarnıñ tarihınen bağlı olaraq ziyadece aydınlatmaq kerek, dep saya «Detektor media» neşiriniñ program direktorı Roman Şutov. Böyle bir fikirnen o Qırım.Aqiqat Radiosınıñ efirinde paylaştı.
«Mesele materialnıñ az olğanınen degil de, onıñ kesik, süslü, resmiy olğanınen bağlı. Eninde-soñunda muayyen bir insannıñ problemleri körünmey, biz onıñ terenliklerine dalamaymız. Qırımnıñ ekologiyası ne alda, memuriy sıñırdan nasıl keçile, yarımadada Ukrainağa köçmegen insanlar nasıl yaşay? İşğalniñ bütün inceliklerini ve muayyen misaller vastasınen kösteilrmek kerek. Bu ise, yalıñız esas Ukrainada yaşağanlarnıñ degil de, Qırım sakinleriniñ de diqqatini çeker», – dep qayd ete media-ekspert.
Daa evel Ukraina teleyayın ve radioeşittirüv meseleleri Milliy şuranıñ reisi Yuriy Artömenko, ukrain informatsion telekanallarınıñ monitoringi neticelerini bildirgen edi. Meger, 2017 senesi avgust-sentâbr aylarında olar efir vaqtınıñ 2% ilhaq etilgen Qırımğa, 8% de –ATO zonasındaki vaqialarğa bağışlanğan eken.
