Link açıqlığı

Qırımtatar milliy Meclisi reisiniñ muavini İlmi Umerov noyabrniñ 7-si, Salı künü «Avropa hatıra ve namus plotforması» adlı mukâfat almaq içün Parijge uçacaq. Bu aqta noyabrniñ 6-nda Qırımtatar resurs merkezi idaresiniñ yolbaşçısı Eskender Bariyev, Kyivde keçken matbuat konferentsiyasında bildirdi.

O, Umerovnıñ namzeti Qırımtatar resurs merkezi ve qırımtatar halqınıñ Milliy Meclisi teşebbüsinen teklif etilgenini qayd etti.

«İlmi Umerov, onen beraber finalda Rusiyeli Vladimir Kara-Murza, Qıtay Halq Cumhuriyetinden kelgen Nobel mukâfatı lauretınıñ ömür arqadaşı, KHDC uquqqoruyıcılar kibi meşur insanlar iştirak etkenine baqmadan, bu mukâfatnıñ laureatı olaraq saylândı. İşte bularnıñ epsine baqmadan bu mukâfatnı İlmi Umerov qazandı ve yarın bizler onı almağa ketecekmiz», – dep ikâye etti Eskender Bariyev.

«Avropa hatıra ve namus plotforması» adlı mukâfatnıñ resmiy saytında haber etilgenine köre, teşkilâtnıñ azaları mukâfatnıñ «totalitarizmge qarşı demokratiya, insan aq-uquqı ve azatlığı, qanun üstünligi oğrunda alıp barğan küreşiniñ tanılması» içün İlmi Umerovke berilmesine rey bergen.

Mukâfat noyabrniñ 8-nde Parijde keçecek «Kommunizmniñ 100 yıllığı. Tarih ve hatıra» konferentsiyasında taqdim etilecek.

Qırımtatar milliy Meclisi reisiniñ muavini İlmi Umerov eki yıllıq yaşav tarzındaki koloniyada qalmasına üküm etilip, eki yıl devamında açıq faaliyetnen oğraşması ve kütleviy haber vastalarında çıqış yapması yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Rusiye akimiyeti İlmi Umerovnen Qırımda mahküm etilgen qırımtatar halqınıñ liderlerinden biri olğan Ahtem Çiygoznı azat etip, oktâbrniñ 25-nde Türkiyege teslim etken edi. Ondan soñ Umerov ve Çiygoz Kyivge kelip çıqtılar.

İlmi Umerov Almaniyada ekimlerniñ teşkerüvinden keçip tedaviylengen soñ, Qırımğa barmaq niyetinde olğanını bildirgen edi.

XS
SM
MD
LG