Link açıqlığı

Rusiyeli adliyeciler halqara mahkemelerge Qırımnen bağlı sanktsiyalarğa qarşı itiraz etmek niyetinde


Rusiyeli adliyecilerden tizilgen mahsus iş eyyeti halqara mahkemelerge Qırımğa nisbeten kirsetilgen sanktsiyalarğa qarşı itiraz etmeknen oğraşmnaq niyetinde. Bu aqta noyabrniñ 6-nda «Qırım dostlarıñ forumında» ekspert-adliyeciler eyyetiniñ başlığı Aleksandr Molohov ikâye etip berdi.

«Bizler Lüxemburgtaki adalet mehkemesi ve Avropra insan aqları mahkemesinde Qırımnen bağlı sanktsiyalarğa itiraz etüv boyunca uquqiy iş başlataraq, itiraz etmek niyetindemiz», – dep bilidire Molohovnıñ sözlerini TASS informagentligi.

Eyyet başlığınıñ sözlerine köre, daa bir yıl evelsi sanktsiyalar rejimi lâğu etilecegi ya da yımşatılacağınen bağlı fikirler beyan etilgen edi.

«Yazıq ki, iç bir şey olmadı. Rusiye ve Qırımğa nisbeten sanktsiyalar devam ete, atta sanktsiyalar rejimi daa ziyade quvetleşti», – dep ilâve etti Molohov.

ABD, «Yediler gruppası» devletleri, diger bir qaç devletnen bir arada AB de, Rusiyeniñ ilk evelâ Qırım, soñradan Donbassnıñ bir qısmı olaraq Ukrainağa tecavuz etken vaqtından başlap, birleşerek bir qaç adımdan ibaret olğan, hususan, Rusiye, işğal altındaki Qırım, donbasslı ve qırımlı separatistler ve Ukraina akimiyetiniñ sabıq temsilcilerine nisbeten paket şeklinde sanktsiyalar kirsetken edi. Bazı sanktsiyalar Rusiye iqtisadiyatınıñ belli bir dallarını bütünley qaplap almaqta.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG