Link açıqlığı

Umerov: Qırımda «rus dünyasından» suvıp başlaylar, lâkin isyan aqqında söz yürsetmege daa erte


Qırımtatar Milliy Meclisi yolbaşçısınıñ muavini İlmi Umerovnıñ fikrine köre, işğal altındaki Qırım «rus dünyasından» suvıp başlay, lâkin yarımadanıñ sakinleri rusiyeli akimiyetke qarşı çıqmağa azır olğanı aqqında söz yürsetmege daa erte.

O, böyle bir fikirne «Novoye vremya» mecmuasına bergen intervyusında bilidrdi.

«Qırımda paralel olğan eki dane - qırımtatar ve rus dünyası bar. Rus dünyası Rusiye akimiyeti ketirgen qaydelerden suvunıp başlay. Lâkin olar Ukrainanı sağınğanı ve er angi bir vaziyette Rusiyege qarşı çıqarlar demege, daa erte», – dedi o.

Onıñ sözlerine köre, Rusiye akimiyetinen razı olmağan qırımtatarları işke alınmay, albuki red sebebi de asla gizlenmey.

«Zaten qırımtatarlarınıñ özleri de devlet işine kirmege pek aves degiller. Er kes bir şeynen oğraşa. Men işten boşap, teplitsa, bostan ve işnen oğraşıp kün körgen oca, ekim ailelerini taniyım», – dep qayd etti Umerov.

Meclis yolbaşçısınıñ muavini, qırımtatarları şok ve qorqunı yavaş-yavaş unutıp başlay ve olarnıñ öz aqları oğrundaki küreşi ög sırağa keçip başlay.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.

Ukraina prezidenti Petro Poroşenko, Almaniya kantsleri Angela Merkelniñ memuriyeti İlmi Umerovnı tedavi etmege azır olğanı aqqında bilidirgen edi.

İlmi Umerov Almaniyada ekimlerniñ teşkerüvinden keçip tedaviylengen soñ, Qırımğa barmaq niyetinde olğanını bildirgen edi.

XS
SM
MD
LG