ABD Ukrainadaki hususiy temsilcisi olğan Kurt Volker aytqanına köre, Donbasstaki vaziyetniñ al etilmesi bile, Rusiye Qırımnı işğal etkenini tanımama siyasetini deñiştirmez.
Bu aqta o Washingtonda keçken brifingte söz yürsetti, dep bildire ABD Devlet departamenti.
AFP jurnalistiniñ Qırımnen bağlı sualine cevap bergende, Volker yarımadanıñ vaziyeti Donbassnen aynı olğanını ayttı.
«Tecavuz etip, topraqlarnı işğal etken bir Rusiye bar. Onıñ içün biz olarnı biri-birinden ayırmaymız: bularnıñ içi birisini tanımaymız ve tanımağa niyetimiz de yoq», – dep ayttı ABD hususiy temsilcisi.
Ondan da ğayrı Volkerge, Rusiyege nisbeten kirsetilgen sanktsiyalarnıñ lâğu etilmesinen bağlı sual berildi. O, eki çeşit sanktsiyalar kirsetilgeni aqqında hatırlatıp, biri Rusiye Qırımnı ilhaq etkeni içün, digeri de Minsk añlaşmalarınen bağlı olğanını ayttı. Bundan ğayrı Volker, sanktsiyalar başqa sebepten de, meselâ, Sergey Magnitskiy işi boyunca kirsetilgenini hatırlattı.
«Bizler sanktsiyalarnıñ lâğu etilmesi aqqında söz yürsetkende, Ukrainanıñ şarqındaki dava neticesinde ve Minsk añlaşmaları yerine ketirlmegeni sebebinden kirsetilgen soyları aqqında aytamız. Eger olar tolusınen eda etilse, mütenasip şekilde sanktsiyalar da lâğu etilir», – dep ayttı ABD hususiy temsilcisi.
Qırımtatar milliy areketiniñ liderleri Musttafa Cemilev ve Refat Çubarov, Rusiye işğal etken Qırımda azat etilgen İlmi Umerov ve Ahtem Çiygoz oktâbrniñ 28-nde Ukraina meseleleri boyunca ABD hususiy temsilcisi Kurt Volkernen körüşti.
Ukraina Yuqarı Radasınıñ tuşqı işler komitetiniñ reisi Anna Gopko, Ukraina meseleleri boyunca ABD Devlet departamentiniñ hususiy temsilcisi olğan Kurt Volkerge «Kremlniñ siyasiy mabüsları olğan Qırımlı ve Donbasslı arbiy esirlerniñ soy-sopları adından» mektüp taqdim etkeni aqqında bildirdi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.
