Rusiyeli «Yabloko» siyasiy firqası Siyasiy komitetiniñ reisi ve bu firqa adından Rusiye prezidentligine namaet olğan Grigoriy Yavlinskiy «Qırım meselesi»ne bağişlanğan sayt açtı.
Bu aqta «Yabloko»nıñ matbuat hızmeti elektron poçta vastasınen dağıtılğan siyasiy haber saifesi bildirmekte.
Yavlinskiyniñ saytı onıñ hususiy saytınıñ alt domeninde yerleştirile ve Qırım meselesine bağışlanğan video-material ve bir sıra yazılı vesiqalar bulundıra.
«Yabloko»nıñ lideri öz saytında,«Qırımnıñ Rusiyege bağlı olğanını kimse tanımay» ve «biz (Rusiye – QA) bu çıqmaz yoldan bir çıqış tapmalımız», dep yaza.
Ondan da ğayrı o: «Eger birisi Qırım meselesi öz-özünen irip keter, dep bellese, o pek yañıla. İrip ketmez. Añlaşmaq kerek olacaq. Tecrübe şunı köstere ki, sanktsityalarnı kimse lâğu etmeycek, bu demektir ki, bu şekilde uyğulanğan tedbirler, zaten taqatsız olğan Rusiye iqtisadiyatını yormağa devam etecek».
Yavlinskiy özüniñ saytında Rusiye prezidenti Vladimir Putinniñ 2008 senesi, Qırım Ukraina toprağı olğanını tanığanı aqqında alman ARD kanalına bergen intervyusınıñ video qaydını derc ete.
Bu hususnen bağlı olaraq Yavlinskiy, bügün de-bügün Putin «Qırım meselesini» Suriyede arbiy areketler alıp bararaq çezmege areket ete, ancaq «dünyada kimse Qırımnı Rusiye toprağı olaraq tanımay».
Ayrıca Yavlinskiy, Qırım ilhaq etilgen soñ, yarımadanıñ sakinleri pasport, diplom ve diger vesiqalar kibi, pek çoq zorluqlarnen qarşılaşqanını da hatırlatıp keçe.
Siyasetçi Qırımda «Kyiv, Moskva, OSCE ve BMT (OON) uyğunlaştırılğan ve bütünley halqara uquq normalarına uyğun qanuniy ve meşru referendum keçirilmesiniñ» tarafdarı olğanını bildire.
«Yabloko» firqası özüniñ siyasiy programmasında, «Qırım Ukraina toprağı olğanını ve ilhaq qanunsızlığı sebebinden lâğu etilmek kerek olğanını» beyan ete.
Ukrainada doğğan Grigoriy Yavlinskiy rusiyeli «Yabloko» siyasiy firqasınıñ tesisçisi ve onıñ Federal siyasiy komitetiniñ reisi ola. 2016 senesi fevral ayında «Yabloko» kongresi Yavlinskiyni 2018 senesi keçirilecek Rusiye prezidenti saylâvına namzet olaraq saylâğan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
