İşğal altında bulunğan Qırımnıñ Rusiyeli FSBniñ taqiqat şubesi noyabrniñ 1-nde yarımadada gaz yolağı ve elektrik direginiñ zararlanması boyunca üç dane cinaiy iş qozğattı.
«Cinayet kodeksiniñ 281 maddesi 1 qısmına binaen (diversiya) bu fakt boyunca üç dane cinaiy iş qozğatıldı», – dep tsitata ketire matbuat hızmetiniñ haberinden, rusiyeli informatsion agentlikleri.
Rusiyeniñ Terrorğa qarşı küreş milliy komiteti, noyabrniñ 1-nde Aluştada gaz yolağı zararlanğanı sebebinden, Yalı boyunda yaşağan biñden ziyade insan gazsız qalğanını bildirgen edi. Aynı zamanda elektrik diregi yıqılğanından elektriknen teminlev de toqtağan edi.
«Krımenergo» haber etkenine köre, oktâbrniñ 31-nde Qırımnıñ Yalı bıoyunı elektriknen qısmen temin etken «Perevalnoye - Aluşta» ve «Aluşta - Luçistoye» yüksek voltajlı yolaqlarda «tehnologik bozuluvlar yüz bergen».
Qırımnıñ uquqqorçalama hızmetleri çeşit türlü versiyalar közden keçirgeni aqqında bilidrgen edi.
Qırım yaqarlıq ve energetika nazirligi, bunıñ arfesinde Qırımnıñ, elektrik diregi yıqılğan Yalı boyundaki mesken yerleriniñ elektriknen teminlenüvi kesilmegen edi, dep bilidire.
