Mahküm etilgen qırımlı Ruslan Zeytullayev Rusiye koloniyasından Ukraina toprağına ekstraditsiya etilmesi talabınen türlü maqamlarğa beşten ziyade ariza yolladı. Talabı red etilse, tekrar açlıq tutmağa azır olğanını Qırım.Aqiqatqa advokat Edem Semedlâyev ayttı.
«Hadimlerden biri oña bunıñ çoqqa baracağını ve belki altı aydan on ayğace devam etecegini söyledi. O, özü içün soñ noqtanı qoydı ve ya menfiy cevap alğan soñ, ya da bu müddet bitken soñ açlığını devam etmege niyetlendi», – dep bildirdi advokat.
O, Zeytullayevniñ şimdi özüni bir qarar is etkenini qayd etip, daa evelki yemekten vazgeçüvleri “iz qaldırmayıp keçmedi”, dedi.
«İnsan üç yıl apishanede buluna, andaki aşlar ve suvnıñ ne türlü olğanını köz ögünde tutmaq kerek, açlıqlar da sağlıqqa tesir ete. Lâkin o, pek qararlı», – dep ilâve etti advokat.
Bir kün evel advokat Edem Semedlâyev müşterisini Başqortostan koloniyasında ziyaret etti.
2016 senesi sentâbrniñ 7-sinde Şimaliy Kavkaz okrugınıñ arbiy mahkemesi Zeytullayevni «terroristik toplulıqta iştirak etüv»de qabaatlı tanıp, oña 7 yıl azatlıqtan marum etilüv cezasını berdi.
Aynı yılnıñ iyul 27 künü Rusiyeniñ Yuqarı mahkemesi Zeytullayev içün azatlıqtan marum etilüv müddetini 15 yılğace uzattı. Buña qarşı Aqyar sakini açlıq ilân etti.
Ukraina Tış işleri nazirligi Rusiyeniñ Yuqarı mahkemesi tarafından azatlıqtan marum etilüv müddetiniñ uzatılmasına narazılıq bildirdi.
Zeytullayev, Rusiyede ve Rusiye tarafından ilhaq etilgen Qırımda yasaq etilgen «Hizb ut-Tahrir» teşkilâtınıñ bir alt birligini teşkil etti deye qabaatlandı.
Siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq belgilengen 15 birleşmeniñ cedveline kirsetip, yasaq etti.
