Link açıqlığı

Qırımda bir kün içinde ekinci gaz boru yolağı zararlandı – Kütleviy haber vastaları


Qırım, Vinogradnoye, gaz boru yolağınıñ zararlanğan yeri, 2017 senesi noyabr 1

Rusiyeniñ kütleviy haber vastaları «Krımgazseti» şirketiniñ başlığı Sergey Tarasovğa sıltav etip, Rusiye tarafından ilhaq etilgen Qırımda daa bir gaz boru yolağı zarar kördi, dep bildireler.

Onıñ malümatınına köre, diametri 270 mm olğan orta basımlı gaz boru yolağı aqqında söz yürsetilmekte. Al-azırda borunıñ Zaprudnoye (Şumhay) köyü yanındaki zararlanğan yeri tetqiq etile.

Tarasovnıñ fikrine köre, «bu, bir diversiya olmaq da mümkün».

Qırımnıñ Rusiye tarafından tayin etilgen yolbaşçısı Sergey Aksönov öz Facebookında: «Tamir brigadaları bütün geçe çalıştı ve şimdi endi yedek boru yolağı qullanılaraq energiya ile teminlev ğayrıdan başlandı. Gaz boru yolağı bir kün içinde evelki vaziyetke qaytarılacaq», dep iddia ete.

Qomşu Rusiyeniñ terrorğa qarşı milliy komiteti noyabrniñ 1-nde Aluştada gaz boru yolağınıñ zararlanğanını bildirdi. Bunıñ neticesinde Yalı boyunıñ biñden ziyade sakini gazsız qaldı.

Haberde, uquqqoruyıcıları «er bir tahminni ve şu cümleden diversiya yapılğanınıñ ihtimalını ögreneler», dep qayd etile.

2016 senesi dekabrniñ 27-sinde Rusiye tarafından ilhaq etilgen Qırım Kerç boğazınıñ tübünden Rusiyeniñ gaz naqliyatı sistemasına bağlanğan edi. Rusiye prezidenti Vladimir Putin, 4 yıl içinde yarımadada 70 kilometrlik magistral gaz boru yolaqları, eki buçuq biñ köyler ararsı gaz boru yolaqları ve sekiz gaz pompalayıcı stantsiyanıñ qurulacağı ve rekonstsruktsiya yapılacağını bildirdi. Onıñ aytışına köre, bu işler yarımadanıñ energiya ihtiyaclarını tolusınen teminleycek.

Kuban – Qırım gaz boru yolağınıñ qurulışı, sözde, tayin etilgen müddetten daa evel bitirildi. Rusiye tarafınıñ bildirüvine köre, gaz boru yolağı yılda 2,1 mlrd ve basım arttırılsa 4 mlrd kubometr gaznıñ pompalanmasını temin ete bile.

Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Sevastopolniñ (Aqyarnıñ) vaqtınca işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih etti. Garp ülkeleri bir sıra iqtisadiy sanktsiyalar qullandılar. Rusiye yarımadanıñ işğalini red etip, oña “tarihiy adaletniñ tiklenmesi”, dey.

XS
SM
MD
LG