Qırımnıñ rusiyeli yolbaşçısı Sergey Aksönov aytqanına köre, elektrik diregi yıqılması sebebinden Qırımnıñ Yalı boyunda kesilgen elektrikniñ ğayrıdan tiklenmesi 72 saat içinde al etilecek eken. Bu aqta noyabrniñ 1-nde o Facebookta yazmaqta.
«Uquq qoruma organları bunıñ sebebini araştıralar. Diversiya da şu cümleden olmaq üzre, bütün versiyalar közden keçirile», – dep bildire Aksönov.
Onıñ sözlerine köre, «acele yardım hızmetleri tez areketke keçken, qaza taqımları da bütün gece çalışqanlar».
«Krımenergo» haber etkenine köre, oktâbrniñ 31-nde Qırımnıñ Yalı bıoyunı elektriknen qısmen temin etken «Perevalnoye - Aluşta» ve «Aluşta - Luçistoye» yüksek voltajlı yolaqlarda «tehnologik bozuluvlar yüz bergen».
Rusiyeniñ Terrorğa qarşı küreş milliy komiteti, noyabrniñ 1-nde Aluştada gaz yolağı zarar körgeni sebebinden, Yalı boyunda yaşağan biñden ziyade insan gazsız qalğanını bildirgen edi.
Ukraina içki işler Nazirligi, işğal altındaki Qırımnıñ rusiyeli akimiyeti noyabrniñ 1-nde gece, yarımadanıñ memuriy sıñırını qapatqanı aqqında haber etken edi.
