Link açıqlığı

Saatnıñ esas haberi

Çiygoz Qırımğa barma niyeti aqqında: «Men anda baracam, işte, bu qadar»


Azat etilgen Qırımtatar Milliy Meclisi reisiniñ muavini Ahtem Çiygoz ICTV telekanalındaki «Svoboda slova» yayınınıñ efirinde, işğal altındaki Qırımğa qaytmağa niyeti olğanını izaatladı.

«Men bu hususta plan qurmayım, men evine ketecem, o qadar. Bu menim degil de, olarnıñ meselesi. Buña nasıl çare tapacağını olar tüşünsin», – dedi Çiygoz alıp barıcınıñ, rusiyeli küç hadimleri onı kirsetmegen taqdirde ne yapacağına dair bergen sualine.

Ahtem Çiygoz ayrıca, esas Ukrainağa eki oğlunı da köçürmek istegenini ayttı.

«Men olarnı (evlâtlarını – QA) nasıl bir alğa tüşseler de, o vaziyetke uyacaq qolaylıq qıdırmasınlar, dep terbiye etken edim. Ağır olsa da, olmasa da – o vatandır, bütün er şey seniñ ruhıñnen nefes alğan yer. Ne yapıp-yapıp, bizler, vatannı terk etmege mecbur qalğanlar, epbir evimizge qaytırmız», – dedi o.

Çiygoz ayrıca, apiske aluvdan evel FSB, işbirlikniñ er türlü şekillerini teklif etkeni, lâkin keççe taktikasını deñiştirip, onı «sındırmağa» areket etkenlerini de qayd etti.

«Bu – olar alışqan bir usul. Alışmañ içün, olarnıñ işi satın almaq, sındırmaq veaşalamaqtır. Rusiyede bu akimiyetniñ başqa bir faaliyeti yoq», – dedi o.

İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.

Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.

Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.

XS
SM
MD
LG