Link açıqlığı

Saatnıñ esas haberi

Osmayev: Amina Okuyeva başına atılğan qurşundan öldi


Cohar Dudayev batalyonınıñ matbuat-zabiti, göñülli asker Amina Okuyeva maşnasına ateş açılğan vaqıtta başına atılğan qurşundan vefat etti. Bu aqta onıñ yaralanğan alda hastahanede yatqan qocası, göñülli asker Adam Osmayev bidirdi.

O, LB.ua neşirine bergen intervyusında, olar başqa regiondan Kyivde qaytqan arada, demiyol keçitinde olarnıñ maşnası ateş açılğanı aqqında ayttı.

«Men çarem olğanı qadar yürmege devam ettim, çünkü qurşunmaşnanıñ motorına tiygen edi. Maşna toqtadı. İlk yardım köstermege istedim, lâkin qurşun onıñ (Amina Okuyevanıñ –QA) başına kelip tiygen edi», – dey Osmayev.

Onıñ sözlerine köre, bu olarnıñ ekisine yapılğan suiqast edi ve mında «Rusiyeniñ izi» bar, dep köre. Osmayev izaatlayaraq, yaqın künlerdeki Ukraina halq deputatı İgor Mosiyçuk yaralanğan patlavda da «Rusiyeniñ izi» mevcut olğanını ayttı.

Kyiv vilâyetiniñ politsiyası, Cohar Dudayev batalyonınıñ matbuat-zabiti ve göñülli asker Amina Okuyeva ve onıñ qocası Adam Osmayev bulunğan maşnağa yolda ateş açqan şahışlarnıñ kimligi araştırılğanı aqqında haber etti.

Politsiya Ukraina Cinayet Kodeksiniñ 115 maddesine binayen (maqsatlı öldürüv) cinaiy iş açmaq niyetinde.

Oktâbrniñ 30-nda saat 20:00de politsiyanıñ 102 hususiy bağı vastasınen, Kyiv-Svâtoşin rayonınıñ Glevaha demiryol stantsiyası yaqınlarında çalılar içinde gizlengen belgisiz şahıslar tarafından maşnağa ateş açılğanı aqqında haber etile. Vaqia yüz bergen yerge devriye politsiyasınıñ acele areket ve taqiqatgruppaları kelip yete.

Amina Okuyevanıñ elâk olğanı aqqında daa evel ictimaiy ağlarda Ukraina iç işleri Nazirligi kollegiyasınıñ azası olğan halq deputatları Anton Geraşenko («Narodnıy front» fraktsiyası) ve elâk olğan şahıs, onıñ yardımcısı olğanı ve yaqın künlerde körüşecekleri aqqında añlaşqanlarını aytqan İgor Mosiyçuk (Radikal firqa fraktsiyası) haber etken ediler.Tahminge köre, yYaqın künlerde, suiqast qurbanı olğan Mosiyçuk yaralı alda hastahanede yatmaqta.

Geraşenkonıñ sözlerine köre Osmayev, onıñ maşnasına Kyiv vilâyetiniñ Glevaha qasabasındaki demiryol keçiti yanlarında ateş açıluvı neticesinde yaralanğan, amma ölüm telükesi yoq.

İyünniñ 11-nde Adam Osmayev suiqast yapılğan edi. O zaman o yaralanğan edi. O arada yaralanmağan Amina Okuyeva ateş açqan şahısnı yaralağan edi. Politsiyanıñ malümatına köre, ücüm etken erkek kişi, özüni jurnalist olaraq tanıtıp, olarnen Kyivde körüşüv yapacağı aqqında evelden añlaşqan eken.

Küç hadimleriniñ versiyasına köre, olar maşnağa mingende, belgisiz şahıs qutudan «Glok» pıştavını çıqarıp, Osmayevniñ köksüne ateş açqan. Amina Okuyeva özüniñ Makarov pıştavından ücüm etken adamğa bir qaç sefer ateş açqan.

Politsiyanıñ versiyasına köre, ücümniñ esas sebebi göñülli qadın-qoca Adam Osmayev ve Amina Okuyevanıñ vatanperverlik pozitsiyasındandır. Küç hadimleri olarnı şiddetli qoruma altına alğan ediler.

2015 senesi fevral ayında Osmayev İsa Munayev elâk olğan soñ, Cohar Dudayev batalyonınıñ yañı komandanı olaraq saylânğan edi. Zenaatı boyuncaekim olğan Amina Okuyeva batalyonnıñ matbuat kâtibi edi.

XS
SM
MD
LG