Link açıqlığı

Ukraina halq deputatı, MVD kollegiyasınıñ azası Anton Geraşenko Faceebookta, Kyiv vilâyetinde maşnağa silâdan atılğan ateş neticesinde Cohar Dudayev batalyonınıñ matbuat-zabiti, göñülli asker Amina Okuyeva vefat etti, dep yaza.

«Ukraina vatanperveri Amina Okuyevanıñ yüregi toqtadı. Onıñ maşnasına Kyiv vilâyetiniñ Glevaha qasabasındaki demiryol keçiti yanlarında çalılar içinden ateş açılğan. Yaralanuv neticesinde Amina vefat etken», – dep qayd ete o.

Geraşenko bergen malümatqa köre, onıñ ömür arqadaşı Adam Osmayev yaralanğan.

Şimdilik bu malümatnı tasdıqlağan başqa bir menba yoq.

İyünniñ 11-nde Kyivniñ Podol rayonında göñülli asker Adam Osmayev ve onıñ ömür arqadaşı Amina Okuyevağa ücüm etilgen edi. Politsiyanıñ malümatına köre, ücüm etken erkek kişi, özüni jurnalist olaraq tanıtıp, olarnen körüşüv yapacağı aqqında evelden añlaşqan eken. Küç hadimleriniñ versiyasına köre, olar maşnağa mingende, belgisiz şahıs qutudan «Glok» pıştavını çıqarıp, Osmayevniñ köksüne ateş açqan, Amina Okuyeva ise, cevap olaraq özüniñ Makarov pıştavından o adamğa bir qaç sefer ateş açqan.

Eki erkek kişi hastahanege alıp barılğan. O zaman Amina Okuyeva bir zarar körmegen. Politsiyanıñ versiyasına köre, ücümniñ esas sebebi göñülli qadın-qoca Adam Osmayev ve Amina Okuyevanıñ vatanperverlik pozitsiyasındandır.

2015 senesi fevral ayında Osmayev İsa Munayev elâk olğan soñ, Cohar Dudayev batalyonınıñ yañı komandanı olaraq saylânğan edi. Zenaatı boyuncaekim olğan Amina Okuyeva batalyonnıñ matbuat kâtibi edi.

XS
SM
MD
LG