Azat etilgen Qırımtatar Milliy Meclisiniñ muavini İlmi Umerovnı imayeci olğan rusiyeli advokat Mark Feygin, Rusiye tarafından işğal etilgen Qırımnı bir daa ziyaret etmekten vazgeçe.
«Men artıq Qırımnı ziyaret etmek niyetinde degilim. Ukrain vatandaşlarını imaye etmek içün, Ukraina akimiyeti maña o yerde bulunmağa izin bergenine baqmadan, men bir nevi qolaysızlıq is ete edim. Qırımnıñ ziyaretinen bağlı Ukraina qanunına bozmağa mecbur qalğan ve izin alğan olsam bile, bu meni pek eze edi. Artıq men bu yükten qurtulabilem», – dep yaza advokat Facebookta.
İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Amnesty International halqara uquq qorçalama teşkilâtı, azat etilgen Qırımtatar Milliy Meclisiniñ muavinleri İlmi Umerov ve Ahtem Çiygoz Qırımğa qaytma ve öz fikirlerini raat izar etme aqqına saip olmalılar, dep bildirgen edi.
