Qırımtatar halqı Milliy Meclisiniñ muavini İlmi Umerov Almaniyada ekimlerniñ teşkerüvinden keçip tedaviylengen soñ, Qırımğa barmaq niyetinde olğanını bildirdi. Bu aqta Umerov özüniñ Facebook saifesinde yazmaqta.
«Bu künlerde maña qol tutqanlarnıñ epsine teşekkür bildirem. Meni Qırımdan çıqardılar degen fikirnen ne razı olam, ne de qabul etip olamayım. Azatlıq menim içün pek aziz, onı pek sevem, lâkin bu Qırımda da olmaq kerek. Küreş devam ete. Yaqında alışacağıma söz berem. Davet üzre Almaniyada teşkerüv ve tedaviy keçken soñ, Qırımğa baracağım», – dep yaza Umerov.
Bunıñ arfesinde Ukraina prezidenti Petro Poroşenko Almaniya kantsleri Angela Merkelniñ memuriyeti İlmi Umerovnı tedavi etmege azır olğanı aqqında bilidirgen edi.
Amnesty International halqara uquq qorçalama teşkilâtı, azat etilgen Qırımtatar Milliy Meclisiniñ muavinleri İlmi Umerov ve Ahtem Çiygoz Qırımğa qaytma ve öz fikirlerini raat izar etme aqqına saip olmalılar, dep bildirgen edi.
İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
