Link açıqlığı

Kreml nezaretindeki Qırım Yuqarı mahkemesi oktâbrniñ 26-da «Hizb ut-Tahrir» musulman teşkilâtında iştirak etmesinde qabaatlanğan Server Zekiryayevni apiste qaldırdı. Bunı Radio Svoboda mühbiri Qırım.Aqiqatqa bildirdi.

«İmayeniñ Zekiryayevniñ 12 balası bar ve ev apsi yeter kibi delilleri red etildi. Oturış qapalı şekilde keçirildi, mahkeme bunıñ sebebini bile aydınlatmadı. Bundan ğayrı, mahkeme ses qaydını yapmağa izin bermedi, bu ise mahkemeniñ açıqlığını bozmaqta», – dep qayd etti advokat Aleksey Ladin.

Oktâbrniñ 11-de saba Bağçasarayda bir qaç qırımtatarınıñ evinde tintüvler olıp keçti. Olarnı «Hizb ut-Tahrir» teşkilâtında iştirak etmesinde qabaatlaylar.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket faalleri, Meclis azalarınıñ evlerinde tintüvler sıqlaştı.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG