İşğal etilgen Qırımda 2017 senesiniñ doquz ayı içinde dünyağa kelgen balalarnıñ sayısı bıltırğa nisbeten eksildi, dep bildire Kreml nezaretindeki Qırım Adalet nazirliginiñ matbuat hızmeti.
«2017 senesiniñ doquz ayı içinde Qırımda 15 735 bala doğdı. 2016 senesi 17 biñ bala dünyağa kelgen edi», – dep bildire matbuat hızmeti.
Adalet nazirliginiñ malümatına köre, Aqmescitte eñ çoq bala doğdı – 4 370, Aqmescit rayonında – 1 158, Yaltada – 1 005, Keriçte – 971 ve Kezlevde – 969. Eñ az bala Ermeni Bazarda doğdı, olarnıñ sayısı – 168, Aqşeyh rayonında – 184, Cürçi – 197, Aqmeçitte – 227, İçki rayonında – 276 ve Sudaqta – 276.
2015 senesine baqılsa, Qırımda doğğan balalarnıñ sayısı eksile. 2015 senesi Qırımda 23 951 bala dünyağa keldi (Kreml nezaretindeki Qırım sağlıq nazirliginiñ malümatı), 2016 senesi 23 900 bala doğdı.
