Link açıqlığı

Litvaniya tatarları birliginiñ reisi – qırımtatarlarğa: Sizni quvacaqlar, amma yarımadada qalıñız


Litvaniya tatarları birliginiñ reisi Adas Yakubauskas qırımtatarlarnı işğal etilgen Qırımdan ketmemelerine çağırdı, çünki Rusiye akimiyeti bunı bekley. Bu aqta o «Espreso TV» intervyüsında dedi.

«Qırımtatarlarnen körüşkende deyim ki: «1944 senesi tekrarlanmaycaq». Eñ qıyını keçti, sürgünlik olmaycaq. Sizni quvacaqlar, vatannı terk etmege zorlaycaqlar. Lâkin andan ketmeñiz, dayanıñız, işğal daimiy degil. Ketseñiz, kelecek nesilleriñiz 50-100 yıldan soñ diaspora olaraq yaşaycaq, assimilâtsiyağa oğraycaqlar, til, kimligini coyacaqlar», – dep qayd etti Yakubauskas.

Rusiye Qırımnı işğal etken soñ yarımadanıñ bazı sakinleri qırımtatarlarğa başqaca yanaşmağa başladı, dey Yakubauskas.

«Eskiden qırımtatarlarğa menfiy yanaşqanını köstermegen insanlar şimdi bunı gizlemey. Qırımtatarlar bazı vaqıtları soqaqqa raat çıqamay. Bu problema, lâkin beklemek kerek. Yarımadadan ketmege olmay. İşğalciler akimiyeti bunı bekley. Qırımnı qırımtatarlardan temizlemek – II Yekaterina zamanlarından berli arz eteler. Qırımda qalmaq – pek müim», – dep qayd etti Litvaniya tatarları birliginiñ reisi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG