Link açıqlığı

Volker azat etilgen Umerov ve Çiygoznen körüşti


Qırımtatar milliy areketiniñ liderleri Mustafa Cemilev ve Refat Çubarov, işğal altındaki Qırımda mahküm etilgen soñ azat etilgen İlmi Umerov ve Ahtem Çiygoz oktâbrniñ 28-nde Ukraina meseleleri boyunca ABD Devlet departamentiniñ hususiy temsilcisi olğan Kurt Volkernen körüşti. Bu aqta Çubarov Facebook saifesinde haber ete.

«Bügün Ukraina meseleleri boyunca ABD Devlet departamentiniñ hususiy temsilcisi olğan Kurt Volkernen pek kolemli ve açıq subet keçirdik», – dep yaza Qırımtatar Milliy Meclisiniñ yolbaşçısı Refat Çubarov.

Kurt Volker Ukrainağa planlaştırılmağan ziyaretnen teşrif buyurdı. O, cuma künü Andrey Parubiy yolbaşçılığındaki ukrain eyyetinen körüşti. Bundan soñ prezident Petro Poroşenkonen qapalı körüşüv keçirildi. Bunıñ arfesinde Volker Ukraina Tışqı işler naziri Pavel Klimkinnen körüşken edi.

Oktâbrniñ 27-nde yapılğan körüşüvde Poroşenko ve Volker Rusiye ve işğal altındaki territoriyalarda esarette tutulğanlarnıñ azat etilmesini muzakere etti.

İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-nde kündüz Türkiyege teslim etilgen edi.Oktâbrniñ 27-si, Cuma künü olar Ukrainağa uçıp keldi.

Oktâbrniñ 28-nde Ukraina Yuqarı Radasınıñ tuşqı işler komitetiniñ reisi Anna Gopko, Ukraina meseleleri boyunca ABD Devlet departamentiniñ hususiy temsilcisi olğan Kurt Volkerge «Kremlniñ siyasiy mabüsları olğan Qırımlı ve Donbasslı arbiy esirlerniñ soy-sopları adından» mektüp taqdim etilgeni aqqında bildirdi.

XS
SM
MD
LG