Link açıqlığı

Saatnıñ esas haberi

ABD devlet kâtibiniñ sabıq yardımcısı: Rusiyege qarşı kirsetilgen sanktsiyalar Qırımnı keri qaytarğanından soñ lâğu etilebilir


Freedom House teşkilâtınıñ sabıq prezidenti ve ABD devlet kâtibiniñ sabıq yardımcısı David Kramer, bütün sanktsiyalar Rusiye işğal etken Qırımnı Ukrainağa keri qaytarğanında lâğu etilmesi mümkün, dep saya. Bu aqta o, Azatlıq Radiosına bergen intervyuda ikâye etip berdi.

«ABDnen diger Ğarp devletleri Rusiyeniñ Qırımnı işğal etmesini qanunsız dep tanıdı. Menim fikrime köre, bu ne qadar devam etse etsin, bizler iç bir şartlarda Qırım işğalini tanımamız mümkün degil ve Rusiyege qarşı kirsetilgen sanltsiyalardevam ettirilmeli», – dep saya Kramer.

O, bir daa dünya «Qırım aqqında unutmağanını» qayd etti.

Onıñ sözlerine köre, eger dünya Qırımnı Rusiyege teslim etse, demek «mustaqillik ve topraq bütünliginiñ bozulmasınen bağlı köz qamaştırğan kerçekni tanıp, qanunsız şekilde Avropanıñ haritası deñiştilgenini tanığan olacaq».

Kramer buña «yol bermemek kerek olğanını» qayd etti.

David Kramer 2008-2009 yıllar arasında ABD devlet kâtibiniñ demkoratiya, insan aqları ve emek meseleleri boyunca yardımcısı vazifesinde çalışğan edi. O, 2010 senesi oktâbr ayından 2014 senesi noyabr ayına qadar Freedom House’qa prezidentlik yaptı. Al-azırda o Mccain İnstitutınıñ insan aqları ve serbestligi boyunca üyken direktor vazifesinde çalışmaqta.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG