Rusiyeli «Rosneft» cermaygaz kompaniyası Avropanıñ Rusiyege qarşı açqan sanktsiyaları sebebinden, Qara deñizniñ şarqiy qısmına tüşken Cenübiy-Qaradeñiz damartısında geologiya keşfi ve cermay çıqarmaqnı beş yılğa toqtattı. Bu aqta oktâbrniñ 27-nde «Rosneft» ve Rusiye Tabiat Nazirligindeki menbalarğa bazanğan TASS bidirmekte.
«Mutehassıslarnıñ qararına binaen, menfiy makroiqtisadiy konyuktura şartları ve sanktsion sıñırlama şimdiki vaqıtta proyekt iqtisadiy ceetten effektiv degidir», – dep bildire TASS kompaniyanıñ temsilcisiniñ sözlerini.
Agentlik bildirgenine kibi, «Rosneft» «Cenübiy-Qaradeñiz damartısında yeraltı baylıqlarını qullanma aqqınıñ ğayrıdan canlındırma ihtimali olğanı aqqında» aytılmaqta.
««Rosneft» Qara deñizniñ Ğarbiy-Qaradeñiz litsenziyalı damartısında kompaniya iş planlarını deñiştırmegeni ve yaqın vaqıtta italyalı Eni cermay şirketinen birlikte keşif-qıymet kesme quyusınıñ burğu işlerine başlaycağını tasdıqladı», – denilmekte rusiyeli informatsion agentliginiñ haberinde.
«Rosneft» mesele boyunca iç bir türlü resmiy izaat bermedi.
Mart ayında Avropa mahkemesiniñ fetvauquqı Avropa Birliginiñ rusiyeli cermay kontsernine nisbeten sanktsiyalar kirsetilmesini qanuniy dep tanığan edi. AB Şurası 2014 senesi iyül ayında kirsetilgen ceza çarelerine yetecek qadar esas berildi, dep yazılğan edi Luxebourgtaki mahkeme qararında.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
