Novoalekseyevkada (Herson vilâyeti) musulman-qırımtatar cemaatı yerli cami toprağında medrese qurmaq niyetinde. Bu aqta Qırım.Aqiqatqa cami imamı Usein Tohlu aytıp berdi.
Onıñ sözlerne köre bu - 600 m2 eki qatlı bina olacaq eken. İlk esaplarğa köre qurucılıq masrafı 300 biñ dollarnı teşkil etecek.
«Şimdilik sponsorlarımız yoq, onıñ içün öz küçümiznen başlaycaqmız, şimdi proyekt azırlıqları yapıla», – dedi Tohlu.
Onıñ tahminlerine köre, medrese içün qurulacaq binanıñ ekinci qatı yeterli olacaq. «Böyle olğan taqdirde birinci qatını kirağa berecekmiz», - dedi imam.
Novoalekseyevka diniy cemiyeti, 2016 senesi Kyivde tizilip, 2017 senesi oktâbr ayında devlet tarafından qayd etilgen Qırım Muhtar Cumhuriyeti (Kyiv) Musulmanlar diniy İdaresine bağlı. Novoalekseyevkada bütün fenler qırımtatar tilinde alıp barılğan yekâne umumtasil mektebi çalışmaqta. Herson vilâyetiniñ cenübinde toplu olaraq yaşağan qırımtatarlarınıñ deerlik cemiyetleriniñ ekseriyeti, Ukraina Musulmanlar diniy İdaresine bağlıdır.
