Link açıqlığı

Saatnıñ esas haberi

Sobçak Qırımda «yañı mustaqil referendum» keçirmekni tevsiye etti


Rusiye prezidenti saylâvlarında iştirak etmege istegenini bildirgen televizion alıp barıcısı Kseniya Sobçak işğal altındaki Qırımda yarımadanıñ statusınen bağlı «yañı referendum keçirmekni» tekli etti. Bu aqta o, oktâbrniñ 27-nde jurnalist ve öz tarafdarlarınen Yekaterinburgda keçirgen körüşüvinde bildirdi.

Sobçaknıñ sözlerine köre, qomşu Rusiye halqara mecburiyetlerini bozğan olsa bile, «Qırımda rus insanları yaşay eken» ve olarğa nisbeten «geosiyaset subyektlerine yapılğan şekilde yanaşmamalı eken». Televizion jurnalisti yarımadada siyasiy teşviqat alıp barmaq niyetinde olmağanı aqqında ikâye etti.

Rusiyeli televizion alıp barıcısı olğan Kseniya Sobçak oktâbrniñ 24-nde Rusiye prezidenti saylâvınen bağlı öz programması aqqında söz yürsetkende, Rusiye Qırımnı işğal eterek, öz mecburiyetlerini bozğanını, ancaq yarımadada «pek çoq rusiyeli yaşağanı» sebebinden, bu mesele muzakere etilmek kerek olğanını beyan etken edi.

«Halqara uquq noqta-i nazarından Qırım – Ukraina toprağı. Noqta», -degen edi Sobçak.

Böyle bir sözler Rusiyede faal şekilde muzakere etilmekte, şu cumleden Sobçak mahküm etilmek kerek olğanı aqqında da aytılmaqta.

Kseniya Sobçaknıñ özü ise, onıñ Qırım aqqında aytqan sözleri içün, o mahküm etilmemeli, dep saya.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG