Almaniya kantsleri Angela Merkelniñ memuriyeti işğal altındaki Qırımda mahküm etilip, soñradan Rusiye akimiyeti tarafından Türkiyege teslim etilgen ve bügün Türkiyeden Ahtem Çiygoz ile beraber qaytqan Qırımtatar Milliy Meclisiniñ muavini İlmi Umerovnı tedavi etmege azır olğanı aqqında bilidirdi. Bu aqta Qırımtatar liderlerinen prezident memuriyetinde körüşüken devlet yolbaşçısı Petro Poroşenko bidirdi. O, Umerovnıñ tedavi etilecegi aqqınnda Almaniya tarafı bügün haber etkenini qayd etti.
«Ahtem ve İlminiñ, albuki bayağı raatsız olğan İlminiñ qudret ve dayanma küçleri, halqara birdemlik timsalidir. Şimdiçik maña haber etigenine köre, sizler de haberdarsıñız ki, bizim almaniyalı dost ve partnörlarımız, İlmini daa ziyade qıynamayıp yibermeleri içün, doğrudan Qırımda oña kerek yardımnı kösterecek ediler. İşte şimdi kantsler Merkelniñ ofisi kerek yardım köstermege azır olğanını tasdıqladı», – dedi Poroşenko.
Ukrainalı esirlerniñ azat etilmesinen bağlı iş eñ birinci yerdedir.
Daa evel 60 yaşındaki İlmi Umerov ilerilemekte olğan Parkinson, basım ve şeker hastalığına tutulğanı aqqında haber etilgen edi.
Prezident Petro Poroşenko taa keçken seneniñ küz aylârında, Almaniya kantsleri Angela Merkelge Qırımtatar Milliy Meclisiniñ muavini İlmi Umerovke Almaniyada tedavi olmasına imkân berilmesini rica etken edi.
Qırımtatat Milliy Meclisiniñ muavini İlmi Umerov ve Ahtem Çiygoznı ketirgen uçaq oktâbrniñ 27-nde «Borispol» ava limanına kelip qondı.
Azat etilgen Qırımtatar Milliy Meclisiniñ muavini İlmi Umerov ve Ahtem Çiygoz oktâbrniñ 26-sı, cumamaqşamı künü Ankarada Türkiye prezidenti Recep Tayyip Erdoğan körüşken edi.
İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
