Ukraina prezidenti Petro Poroşenko oktâbrniñ 27-nde, Türkiyeden uçaqnen kelgen Qırımtatar Milliy Meclisiniñ muavinleri İlmi Umerov ve Ahtem Çiygozni «Yararlıq» ordenlerinen taqdirledi.
«Ukraina devletçiligi, azatlıq idealları ve insanlarnıñ anayasada belgilengen aq-uquqlarını qorçalanğan vaqıtta vatandaşlıq cesareti ve qırılmaz ruhlarınıñ küçüni köstergen İlmi Umerov, ekinci derece «Yararlıq» ordeninen taqdirlene, dedi devlet mukâfatlarını taqdim merasiminde, Ukraina prezidentiniñ memuriyet yolbaşçısınıñ muavini İgor Raynin.
Ahtem Çiygoz üçünci derece «Yararlıq» ordeninen taqdirlendi.
«Yaralıq» ordeni 1996 senesi sentâbrniñ 22-nde Ukraina prezidentiniñ №870/96 sanlı qararınen tesis etilgen edi. O Ukraina içün iqtisadiy, ilmiy, ictimaiy-medeniy, arbiy, devlet, cemaatçılıq ve diger saalarda yüksek yeñişler köstergen Ukraina vatandaşları berile.
Ukraina Prezidentiniñ şerefli nişanınen taqdirlengen vatandaşlar «Yararlıq» ordenleri kavaleri dep adlandırıla.
Qırımtatat Milliy Meclisiniñ muavini İlmi Umerov ve Ahtem Çiygoznı ketirgen uçaq oktâbrniñ 27-nde «Borispol» ava limanına kelip qondı.
Azat etilgen Qırımtatar Milliy Meclisiniñ muavini İlmi Umerov ve Ahtem Çiygoz oktâbrniñ 26-sı, cumamaqşamı künü Ankarada Türkiye prezidenti Recep Tayyip Erdoğan körüşken edi.
İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
