Link açıqlığı

Poroşenko Umerov ve Çiygoznen körüşe (canlı yayın)


Ukraina prezidenti Petro Poroşenko oktâbrniñ 27-nde Kyivde, azat etilgen Qırımtatar Milliy Meclisiniñ muavini İlmi Umerov ve Ahtem Çiygoznen körüşe. Bu aqta Ukraina devleti yolbaşçısınıñ matbuat hızmeti bildirmekte.

Körüşüv saat 16da Bankovaya soqağı, 11de adresinde yerleşken Ukraina prezidentiniñ memuriyeti binasında keçirilmesi planlaştırıla edi, lâkin biraz keççe başlandı.

İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.

Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.

Bunıñ arfesinde Türkiye prezidenti Recep Tayyip Erdoğan Ankarada, azat etilgen qırımtatar halqınıñ liderleri olğan İlmi Umerov ve Ahtem Çiygoznen körüşti.

Oktâbrniñ 27-si künü, saba azat etilgen qırımtatar milliy areketiniñ liderleri olğan İlmi Umerov ve Ahtem Çiygoz uçaqnen Ukrainağa uçmaları içün Ankara ava limanından ozğarıldı.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.

XS
SM
MD
LG