Qırımtatar Milliy Meclisi reisiniñ muavini Ahtem Çiygoz, Rusiye tarafından işğal etilgen Qırımdaki apisten onıñ ve İlmi Umerovnıñ azat etilmesinen bağlı hususiy operatsiyanı «qurtaruv» dep adlandırdı. Bu aqta o oktâbrniñ 27-nde Borispol ava limanında keçirilgen brifingte beyan etti.
«Bizlerni Ankarağa yollaycaqları aqqında bilmey edik, çünki bu yıllar içinde ilk istegimiz Kyivge kelmek edi. Türkiy dünyanıñ küçlü liderlerinden biri (Türkiye prezidenti recep Tayyip Erdoğan – QA) prezidentimiz (Petro Poroşenko – QA), bizim liderimiz Mustafa Cemilevniñ ricası üzerine, bizim azat etilmemiznen bağlı pek ciddiy körüşüvler keçirdi», – dep ikâye etti Çiygoz.
O, bu hususiy operatsiyağa «azat etilüv» dep olamayım, - dedi.
«Azat etilüv – azatlıq demektir ve bu, bizler ayrı bir şahıslarnıñ azatlığı içün alıp barğan küreşimizdir. Bu – halqımnıñ, topraqımnıñ azatlığıdır, ancaq qorqqanı sebebinden kâğıt üzerinde yazılğanına uymadan, meni qoyıp yibermek kerek ekende, böyle bir hususiy operatsiya keçirerek, bir işareti olmağan urba ve maska kiygen insanlar alıp ketken maalde, üç yıldan soñ, olar zamanında meni apiske alıp ketken, işte o faşistler olğanını añladım. Ne yerge alıp ketkenleri de belli degil. Biz (Çiygoz ve Umerov – QA) soñki daqqağace iç bir şey bilmey edik (qayda ketkenlerini – QA)», – dep saya Çiygoz.
O ayrıca, apisten azat etilüv esnası bu qadar tez keçer dep bellemegen aqqında ayttı.
Qırımtatat Milliy Meclisiniñ muavini İlmi Umerov ve Ahtem Çiygoznı ketirgen uçaq oktâbrniñ 27-nde «Borispol» ava limanına kelip qondı.
Azat etilgen Qırımtatar Milliy Meclisiniñ muavini İlmi Umerov ve Ahtem Çiygoz oktâbrniñ 26-sı, cumamaqşamı künü Ankarada Türkiye prezidenti Recep Tayyip Erdoğan körüşken edi.
İşğal altındaki Qırımda mahküm etilgen Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
Rusiye Devlet Duması, prezident Vladimir Putinden qırımtatar milliy areketiniñ liderleri İlmi Umerov ve Ahtem Çiygoznıñ afu etilmesini, Qırım musulmanlarınıñ müftisi Emirali Ablayev rica etken eken dep ayta.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşıp, kütleviy haber vastalarında çıqış yapmaqnı yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi.Ahtem Çiygoz 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
