Ukrain siyasiy mabüslarınıñ azat etilmesi artından işğal altındaki Qırım ve Donbass azat etilip, Ukrainanıñ topraq bütünligi tiklenecek. Bu aqta Qırımtatar Milliy Meclisiniñ muavini İlmi Umerov oktâbrniñ 27-nde Borispol ava limanında keçirilgen brifingte beyan etti.
«Bu esnas devam etecek. Ayrı bir insanlarnıñ azat etilmesinden soñ, Qırım illâ ki azat etilip, Ukrainanıñ topraq bütünligi tiklenecek. Bizim bütün küreşimiz bunıñ oğrundadır», – dedi İlmi Umerov.
Onıñ sözlerine binaen, nevbetteki mesele Ukraina Anayasasında Qırımnıñ statusı deñiştirilmesinen bağlı qanunnıñ qabul etilmesi olacaq.
«Bu qararlar artıq tuvğan devletimiz (Ukraina – QA) içinde qabul etilecek», – dep yekünledi Umerov.
Qırımtatat Milliy Meclisiniñ muavini İlmi Umerov ve Ahtem Çiygoznı ketirgen uçaq oktâbrniñ 27-nde «Borispol» ava limanına kelip qondı.
Azat etilgen Qırımtatar Milliy Meclisiniñ muavini İlmi Umerov ve Ahtem Çiygoz oktâbrniñ 26-sı, cumamaqşamı künü Ankarada Türkiye prezidenti Recep Tayyip Erdoğan körüşken edi.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-ndeTürkiyege teslim etilgen edi.
Ğayrı resmiy malümatqa köre, Ahtem Çiygoznen İlmi Umerovnıñ teslim etilmesi boyunca Türkiye Cumhuriyetiniñ prezidenti Recep Tayyip Erdoğannıñ Rusiye prezidenti Vladimir Putinnen yapqan soñki körüşüvi esnasında añlaşqanlar.
