Qırımtatar halqı Meclisiniñ reisi Refat Çubarov haber etkenine köre, Ahtem Çiygoz ve İlmi Umerovnıñ Kyivge kelişi oktâbrniñ 27-ne keçirile. Bu aqta Çubarov özüniñ Facebook saifesinde yazmaqta.
«2017 senesi oktâbrniñ 27-nde ötkerilecek matbuat konferentsiyasınıñ tam saatı ve İlmi Umerovnen Ahtem Çiygoznıñ Kyivge kelişleriniñ deñişme sebebi aqqında bügün saat 21:00 haber etilecek», – denilmekte haberde.
Daa evel qırımtatar milliy areketiniñ liderleri Kyivge oktâbrniñ 26-nda kelecekleri aqqında haber etilgen edi.
Oktâbrniñ 25, çarsenbe künü işğal altındaki Qırımda mahküm etilgen Çiygoz ve Umerov Türkiyege teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
