Link açıqlığı

Groysman Çiygoz ve Umerov azat etilgeni aqqında: Rusiye bu şekilde areket etmege mecbur edi


Vladimir Groysman

Rusiye akimiyeti qırımtatar milliy areketiniñ liderleri olğan Ahtem Çiygoz ve İlmi Umerovnıñ azat etilmesinen bağlı körüşüvler keçirilgende, bu şekilde areket etmege mecbur edi. Bu aqta baş nazir Vladimir Groysman Facebook saifesinde yazmaqta.

«İşğalciler Ukrainanıñ qırımtatar halqına qarşı yapqan repressiyalarını devam ettirse de, bu sefer imtiyaz tanımağa mecbur qalğan edi. İlmi Umerovve Ahtem Çiygoznıñ cesaret ve vatanperverliklerine şaamamaq mümkün degil. Olarnı sabırsızlıqnen tuvğan toprağında bekleymiz», – denilmekte haberde.

Vladimir Groysman ayrıca, Umerovve Çiygoznıñ oktâbrniñ 26-nda Kyivge kelip çıqacaqlarını da qayd etti.

İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.

Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.

XS
SM
MD
LG