Link açıqlığı

Qırımtatar milliy areketiniñ liderlerinden biri olğan Ahtem Çiygoz, azat etilüvi onıñ içün beklenmegen bir şey olğanı ve Kreml nezaretindeki Qırım Yuqarı mahkemesi tayin etken bütün müddetni apishanede keçirmege azır olğanı aqqında ikâye etip berdi. Bu aqta Çiygoz oktâbrniñ 26-nda Qırım.Aqiqat Radiosınıñ efirinde söz yürsetti.

«Bizim (Çiygoz ve Umerov - QA) azat etilüvimiz Ukraina ve Türkiyeniñ ciddiy bir yeñişidir. Menim içün bu beklenmegen bir yañılıq olıp çıqtı, çünki men apishanede 8 yıl yatmağa azaırlanğan edim.Türkiyege ketecegimiz aqqında eşitkenim de menim içün apansızdan aytılğan bir yañılıq oldı. Bizler, elbette ki, pek aves etemiz ve bügün öz devletimizde – Kyivde olacaqmız», – dedi Ahtem Çiygoz.

O ayrıca, tutulıp alınğan kününden başlap, oña azat ve afu etmeleri içün rica etmesi teklif etilgen, ancaq Çiygoz aşikâr bir tarzda bunı red etkenini de ilâve etti.

Çiygoznıñ sözlerine köre, o Rusiyede ve o işğal etken Qırımda tutulğan bütün siyasiy mabüslar içün alıp barılğan küreşni devam ettirmek niyetinde eken.

«Men apishanede olğanımda zaten devam ettirgen küreşimniñ yalıñız şartları deñişti. Artıq daa ziyade imkânğa saip olacağımdan eminim», – dep qayd etti Çiygoz.

İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.

Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.

Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.

Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.

XS
SM
MD
LG