Ukraina prezidenti Petro Poroşenko Rusiye tarafından daa evel mahküm etilerek, azat etilgen qırımtatar milliy areketiniñ liderleri olğan Ahtem Çiygoz ve İlmi Umerovnı hayırladı. Poroşenkonıñ matbuat hızmeti bildirgenine köre, Ukraina prezidenti al-azırda Türkiyede bulunğan Çiygoz ve Umerovnen telefon vastasınen qonuşqan.
«Bügün siziñ içün küreşken, azat olmañız içün dua etken millionlarnen ukrainalı içün pek bahtlı bir kündir. Men bellesem, bügün sizler, yalıñız sizlerniñ azat etilmeñiz oğrunda küreşkenlerden ğayrı, bütün qırımtatarlarına ümüt bağişladıñız – aqiqat epbir yeñip çıqar, bizler epbir Qırımnı keri qaytarıp alırmız. Ukraina ayaqqa turar, biz epimiz illâ ki birleşirmiz», – dep ilâve etti Poroşenko.
Ayrıca o: «Men sizlerni ür olğanıñıznen hayırlamayım, çünki üriyet biz, bizim qırımtatarlarınen beraber Qırımda olğanımızda qazanılğan sayılacaq. İşte bu, kerçek manada bir üriyet olur. Şimdi ise bu pek muim, lâkin bizim küreşimizniñ aradaki bir basmağıdır» - dep ilâve etti.
Prezident, Ahtem Çiygoz ve İlmi Umerovnı Kyivde beklegenleri içün, Ukrainanıñ Türkiyedeki büyük elçisine tez vaqıtta kerek işlerniñ yapılmasını avale etti.
«Men sizler içün ğururlanam, çünki sizler kerçek Ukraiana vatanperverleri olasıñız. Sizler Uktrainanen qırımtatar halqınıñ kerçek oğullarısıñız. Sizler küç-quvetiñizni numayış etkeniñiz içün sizlerni selâmlayım, çünki sizler kerçek qaramansıñız, - dedi Ukraina prezidenti.
O, Ahtem Çiygoz ve İlmi Umerovnıñ sağlığını soraraq, Kyivde tolusınen tibbiy tedqiqten keçip, tedavi olabileceklerini qayd etti.
İşğal altındaki Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerov oktâbrniñ 25-nde teslim etildi.
Ukraina prezidenti Petro Poroşenko oktâbrniñ 25-nde, Türkiye Cunhuriyetiniñ prezidenti Recep Tayyip Erdoğannı Qırımda mahküm etilgen qırımtatar milliy areketiniñ liderleri Ahtem Çiygoz ve İlmi Umerovnıñ azat etilmesinde ğayret köstergeni içün teşekkür bildirdi.
Kreml nezaretindeki Aqmescit rayon mahkemesi sentâbrniñ 27-nde Umerovnı eki yıllıq yaşav tarzındaki koloniyada qalmasına üküm etip, eki yıl devamında açıq faaliyetnen oğraşması ve kütleviy haber vastalarında çıqış yapmasını yasaqlanğan edi. Umerov kutleviy surette separatizmge çağırmaqta qabaatlanğan edi. Onıñ özü oña qarşı qozğatılğan cinaiy iş siyasiy renk taşığanını aytqan edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
