Rusiye Qırımğa yañı silânı mudafaa maqsadınen degil de, esas Ukrainağa ücüm etmege azırlanğanı içün ketire dep saya, Ukraina General Ştabı başlığınıñ sabıq muavini general-leytenant İgor Romanenko. Böyle bir fikirni o Qırım.Aqiqat Radiosı efirinde bildirdi.
«Men bilgenime köre, yıl soñuna qadar Kefege PVO C-400 kompleksleriniñ daa bir devizionı ketirilmesi planlaştırıla. Su-24 ve Su-25 kibi eskirgen uçaqlar Su-30 uçaqlarınen deñiştirile, Qara deñiz flotuna da yañı gemiler ketirile. Rusiyeliler deñizde ve Qırımnıñ şimalinde keçirgen talimleriniñ şekli, silânı Ukrainağa tecavuz etme maqsadınen toplağanını köstere», – dep qayd etti arbiy ekspert.
Cenübiy arbiy okrug Hava quvetleri (PVO) ve Arbiy ava quvetleri (VVS) komandanı general-leytenant Viktor Sevostyanovnıñ sözlerine köre, Rusiyeniñ Qırımda yerleşken Silâlı quvet birlikleri yañı ve modernize etilgen ava tehnikasınen donatıluvı eñ birinci yerdedir. Ondan da ğayrı, yarımadada yerleşken rusiyeli ordu ihtiyarına pek yaqın zamanda eñ yañı C-400 «Triumf» adlı top-raketa kompleksi ketirilmeli. İlk malümatqa köre, o Kefe etrafında yerleştirilecek eken.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
